Në fillim të javës së ardhshme pritet të shpallen rezultatet përfundimtare

15:39 | 26 Shkurt 2021
arbresh.info

Zëdhënësi i Komisionit Qendror të Zgjedhjeve, Valmir Elezi, thotë se në bazë të punës në Qendrën e Numërimit të Rezultateve, rezultatet përfundimtare për zgjedhjet e 14 shkurtit mund të shpallen në fillim të javës së ardhshme.

“Rinumërimi i vendvotimeve dhe vlerësimi i pakove të supozuara me fletëvotime të cilat kanë ardhur nga jashtë Kosovës, mund të themi se janë në përfundim e sipër dhe presim që të përmbyllen ditën e shtunë. Kjo na bën të mundur që të fillojmë me numërimin e votave me kusht dhe votave të ardhura me postë. Pas përfundimit të tyre dhe procedurave këtu në QNR, atëherë KQZ-ja është e gatshme për të shpallur rezultatet përfundimtare për subjektet politike dhe kandidatët dhe besojmë shumë se do të bëhet në fillim të javës”, thotë Elezi, raporton arbresh.info.

Deri më tani janë rinumëruar rreth 70% apo 377 vendvotime nga 552 sa është numri i përgjithshëm i tyre pas vendimit të fundit të KQZ-së. Shërbimi votues i KQZ-së është në përfundim e sipër të vlerësimit të rreth 43 mijë e 500 pakove të supozuara me fletëvotime që kanë ardhur nga jashtë Kosovës, nga 2 – 12 shkurt./arbresh.info/