Pandemia e koronavirusit ka ndryshuar edhe sjelljen e konsumatorëve shqiptarë duke i drejtuar më shumë nga paisjet elektronike dhe ato farmaceutike kërkesa në rritje është shoqëruar edhe çmime më të larta.

Referuar të dhënave të INSTAT çmimi i grupit “Prodhimi i produkteve optike, elektronikë, kompjuterikë” ka shënuar një rritje me 5.3%, ndjekur më pas nga “Përpunimi i produkteve dhe preparateve farmaceutike” me 4,1 %.

Ndërsa një rënie çmimesh është reflektuar në aktivitetin “Metalurgjia” me 3,9 %, pasuar nga “Prodhimi i produkteve të kauçukut dhe plastikës” me 2,5 %.

Nga ana tjetër pandemia ka dhënë një ndikim edhe në sektorin e prodhimit.

Shifrat e publikuara nga INSTAT tregojnë për çmime të ulura.

Indeksi i Çmimeve të Prodhimit arriti në 98,2 duke shënuar një ulje me 4,1 %, krahasuar me tremujorin e tretë të vitit 2019.

Industria nxjerrëse e ka ndjerë më shumë krizën teksa raportohet një rënie vjetore me 19.5%.

Brenda këtij seksioni, me një impact të madh në muajin shtator, ulja më e madhe e çmimeve është shënuar në aktivitetin “Nxjerrja e naftës bruto dhe gazit natyror” me 31,3 %.

Çmimet e prodhimit për produktet vendase krahasuar me të njëjtën periudhë të një viti më parë shënuan ulje me 2,7 %.

Edhe në këtë rast industria nxjerrëse dhe grupi “energjia elektrike, gaz, avull dhe ajër i kondicionuar” pësuan dhe uljen më të madhe përkatësisht me 11,7% dhe 4,4%./oranews