Deputetja e Kuvendit të Kosovës, Mimoza Kusari, ua ka uruar fitoren presidenciale Joe Biden dhe Kamala Harris.

Kusari, nëpërmjet një postimi në llogarinë e saj në ‘Twitter’ ka thënë se është tejet e lumtur me zgjedhjen e popullit amerikan.

“E lumtur dhe krenare përtej fjalëve me zgjedhjen e popullit amerikan, e cila do rezultojë në shfaqjen e përgjegjësisë dhe funksionimin e demokracisë, jo vetëm në SHBA por në të gjithë botën. Urime për presidentin Joe Biden dhe nën-presidenten Kamala Harris. Zoti e bekoftë Amerikën”, ka shkruar Kusari.

Joe Biden është zgjedhur presidenti i 46-të i Shteteve të Bashkuara të Amerikës pas një garë të ashpër me republikanin, Donald Trump, i cili synonte të merrte edhe një mandate të dytë si njeriu i parë i Amerikës.

Biden në gjithë procesin e numërimit të votave ka qenë duke prirë, derisa vendimtare ka qenë përmbysja që i ka bërë në Trumpit në shtetin e Pensilvanisë.

Tashmë Biden ka mbi 270 vota elektorale, të cilat ia mundësojnë hyrjen në Shtëpinë e Bardhë si i pari i Amerikës.

Përgjatë historisë, Joe Biden, njihet për afërsinë dhe miqësinë shumë të ngushtë me shqiptarët, sidomos me Kosovën.

Përgjatë viteve të 90-ta, ai ka qenë avokues i madh i lirisë së Kosovës dhe kishte kërkuar me ngul që SHBA të bombardonte Serbinë.