Janë pezulluar punimet në rrugën Deçan – Plavë pas takimit të kryeministrit Avdullah Hoti me kryetarin e Komunës së Deçanit, Bashkim Ramosaj.

Këtë vendim e ka mirëpritur Ambasada Amerikane në Kosovë, e cila thotë se ndërtimi i kësaj autostradë ka të bëjë më shumë për tokën dhe qasjen, transmeton portali arbresh.info.

“Ndërtimi i autostradës Deçan-Plavë është më shumë për tokë dhe qasje. Bëhet fjalë për respektimin e vendimeve gjyqësore, respektimin dhe ruajtjen e të drejtave të të gjithëve për të praktikuar besimin e tyre dhe të jetojnë paqësisht me fqinjët e tyre, dhe vlerësimin e trashëgimisë së pasur të Kosovës dhe diversitetit kulturor. Bashkëpunimi dhe angazhimi për zgjidhje që respektojnë vendimin e gjykatës është e vetmja rrugë përpara që çon në një zgjidhje të vërtetë. Takimi i Kryeministrit sot me kryetarin Ramosaj është një hap në drejtimin e duhur”, thuhet në reagimin e Ambasadës së SHBA-ve në Kosovë.

Kryeministri i Kosovës, Avdullah Hoti ka pritur në takim kryetarin e Komunës së Deçanit, Bashkim Ramosaj. Në të cilin takim u diskutua për rrugën Deçan-Plavë.

Në këtë takim siç bëjnë të ditur nga zyra e kryeministrit, Hoti e Ramosaj janë pajtuar që të pezullohen punimet për rrugën Deçan-Plavë

“Kam zhvilluar takim me Kryeministrin Hoti, ku jam dakorduar t’i jap afatin e arsyeshëm të bëjë zgjidhjen e kontestit për ndërtimin e rrugës”, tha Ramosaj pas takimit me Hotin./arbresh.info/