Ndeshja kualifikuese për Ligën e Evropës mes Lincoln Red Imps dhe Prishtinës është pezulluar.

Vendimi është marrë nga autoritetet e atjeshme dhe kësisoj, rasti kalon në duart e Komitetit Disiplinor të institucionit drejtues të futbollit evropian, UEFA.

Prishtinës para ndeshjes i dolën tetë futbollistë pozitivë.

Tani futbollistët e Prishtinës janë lënë jashtë hotelit ku ishin vendosur dhe po presin për t’u nisur drejt aeroportit të Gjibraltarit.

Zyrtari i FC Prishtinës, Kushtrim Sopa, ka konfirmuar që skuadra do të kthehet në shtëpi.

“Shteti i Gjibraltarit nuk e ka lejuar zhvillimin e ndeshjes, ani pse ne i patëm të gatshëm lojtarët për të nisur takimin”, deklaroi Sopa për “RTK”.

“Skuadra tani do të marrë rrugën për t’u kthyer drejt Kosovës”, shtoi ai.

Prishtina mbetet në pritje të vendimit final të UEFA-s për fatin e takimit.