Ish-kryetarja e bordit të Telekomit të Kosovës, Besa Shatri-Berisha në një bisedë telefonike me arbresh.info bën të ditur se ka dhomë të përgjimeve në Telekom, ani ndërmarrja publike e mohoi një gjë të tillë.

Ajo ka konfirmuar se ka dhomë të përgjimeve duke të thënë se të gjithë operatorët kanë të tilla dhe përdoren nga Prokuroria e Shtetit.

“Krejt operatorët i kanë dhomat e përgjimeve, të cilat përdoren nga Prokuroria e Shtetit”.

“Është zyre e veçantë, ku janë të vendosura pajisjet e përgjimeve, zyrë e cila ka qasje të kufizuara se kush hyn brenda e kush del”, deklaroi ajo.

Gjatë ditës së sotme (e premte) një gjë të tillë e kishte mohuar Fadil Lepaja nga Departamenti për Relacione me Publikun në Telekomin e Kosovës  se ka dhomë të përgjimeve. Ky reagim i Telekomit erdhi pas akuzave të presidentit Hashim Thaçi ndaj kryeministrit në detyrë Albin Kurti dhe siç e ka quajtur presidenti, “grupit të tij”.

LEXO EDHE: Telekomi mohon ekzistencën e dhomës së përgjimeve

Në njoftimin për media theksohet se pas deklaratave joprofesionale dhe të pambështetura në fakte të zyrtarëve të lartë të shtetit, të cilat e dëmtojnë pa të drejtë reputacionin e Telekomit të Kosovës nuk posedojnë dhoma të përgjimeve.

Presidenti Thaçi ka akuzuar Albin Kurti, Haki Abazin e Xhelal Sveçlën se kanë vizituar dhomën e përgjimeve në Telekomin e Kosovës tri ditë rresht, duke i ndalë kamerat aty.

E lidhur me këto deklarata Prokuroria Speciale e Kosovës ka nisur hetimet ndaj tre të apostrofuarve.

Kjo ka bërë që mes dyshes Thaçi e Kurti të shpërthejnë akuza e kundërakuza, ku ky i fundit e quajti Presidentin helaq./ArditëShkodra/arbresh.info/