Instituti për Politika Sociale “Musine Kokalari” ka ftuar të institucionet shtetërore të Kosovës që të hartojnë dhe të zbatojnë një plan konkret kundër diskriminimit ndaj komunitetit LGBTQI.

Në njoftimin e tyre thuhet se ky komunitet vazhdon të përballet me gjuhë të urrejtjes, dhunë fizike, dhunë morale, diskriminohet nga mospranimi social, nga mostoleranca në hapësirë publike, nga e drejta për punësim dhe në punë, si dhe nga (vetë) censura e institucioneve shtetërore dhe të akterëve shoqëror, për shkak të orientimit seksual apo të identitetit gjinor.

“Pozita dhe gjendja shoqërore e komunitetit LGBTQI në Kosovë dëshmon më së miri se kuadri ligjor dhe deklarimi politik për barazinë e të gjithëve nuk mjafton për të jetuar pa paragjykime, pa stigmatizime, pa presion, pa frikë, pa dhunë dhe pa diskriminim”.

“Shteti duhet të kujdeset për këtë komunitet duke e përkrahur në mënyrë eksplicite dhe duke ndërtuar politika për ta luftuar diskriminimin kundër komunitetit LGBTQI”.

“Dita ndërkombëtare kundër homofobisë, transfobisë, bifobisë dhe interseksfobisë nuk duhet të shërbejë vetëm si shënim i një kremtimi për imazh të jashtëm, në funksion të plotësimit të standardeve dhe të normave ndërkombëtare për të drejtat e njeriut, por para së gjithash si një vetëdijësim dhe emancipim shoqëror drejt zhvillimit të mëtejmë të diversitetit të pasur shoqëror të Republikës së Kosovës dhe të Ballkanit Perëndimor”, thuhet në njoftim.