Ministri i Shëndetësisë, Arben Vitia, nuk bëri të ditur dorëheqjen, pas rastit tragjik që ndodhi me të riun në karantinën në Qendrën Studentore.

“E kam menduar”, tha ministri Vitia duke treguar se do të hetohet rasti në tërë zinxhirin e organizimit të ardhjes, që nga ambasada në Berlin.

Ministria e Shëndetësisë përmes një konference për medie ka shpjeguar procedurat rreth vendosjes së personave në karantinë.

Me këto rregulla thonë se janë njoftuar edhe përfaqësuesit  e Kosovës në Ambasada dhe konsullata.

Sipas, rekomandimeve të IKSHPK-së, për vetëizolim 14 ditë të personave që paraqiten në pikat kufitare me rekomandim të ekipit mjekësor në kufi, në bazë të dokumentacionit mjekësor të këtyre personave rekomandohen:

1. Personat me probleme shëndetësore duke përfshirë edhe sëmundjet kronike;
2. Personat e moshës mbi 70 vjeç (viti 1950 )
3. Fëmijët nën 18 vjeç që janë pa shoqërim të prindërve;
4. Profesionistët që do të jenë në shërbim të parandalimit dhe luftimit të COVID-19 (mjek, polic, dhe pjesëtar të FSK-së).
5. Personave që hyjnë në RKS dhe do të jenë përcjellës për varrime të familjarëve të tyre.

Këtyre personave, që rekomandohen për izolim për të parandaluar COVID-19 duhet t’u shpjegohet protokolli i izolimit dhe kushtet e rrethanat e qëndrimit në karantinë shtëpiake 14 ditë dhe të njëjtit nënshkruajnë një deklaratë nën betim për respektim të rregullave të vetizolimit.

Më 3 maj, 2020, në ora 17:16 ekipi menaxhues i Karantinës në Qendrën e Studentëve në Prishtinë është njoftuar nga një zyrtar i Policisë së Kosovës në Qendrën e Studentëve se një person është gjetur në oborrin e Konviktit Nr. VII, me dyshim se ka rënë nga kati V-të.

Personi ka vazhduar të reanimohet edhe në Klinikën Emergjente nga ekipet kujdestare, të cilët e kanë vazhduar kujdesin e avancuar.

Për fat të keq, me gjithë përpjekjet e mjekëve në Klinikën e Emergjencës, personi nuk ka mbijetuar.

Organet e hetuesisë janë duke u marr me sqarimin e rrethanave të vdekjes./arbresh.info/