Ambasada e SHBA-ve në Tiranë ka nënshkruar përes USAID-it një memorandum mirëkuptimi me Këshillin e Lartë Gjyqësor, në mënyrë që mijëra dosjet e mbetura në Gjykatën e Lartë, të shqyrtohen me shpejtësi më të madhe.

Për këtë, Ambasada e SHBA-ve njofton se do të vihet në dispozicion një ekip i posaçëm avokatësh që do të punësohen për ta ndihmuar gjykatën të veprojë me më shumë efikasitet në shqyrtimin dhe mbylljen e dosjeve.

Njoftimi i Ambasadës:

Gjykata e Lartë ka aktualisht pothuajse 35,000 dosje të prapambetura. Për të zgjidhur këtë problem, USAID dhe Këshilli i Lartë Gjyqësor Shqiptar nënshkruan një Memorandum Mirëkuptimi më 29 prill, për të ofruar ndihmën teknike të nevojshme. Sipas kësaj marrëveshjeje, një ekip i veçantë avokatësh të zotë shqiptarë do të punësohen për të ndihmuar gjykatën që të veprojë me më shumë efikasitet dhe të mundësojë që gjykatësit të marrin vendime më shpejt. Ashtu siç Shtetet e Bashkuara mbështetën fuqimisht miratimin e reformave gjyqësore, ashtu ne mbështesim fuqimisht zbatimin e plotë dhe në kohë të këtyre reformave. Drejtësia e vonuar është drejtësi e mohuar. Ne presim të shohim numrin e prapambetur të këyre çështjeve që zvogëlohet sa më shpejt që të jetë e mundur.