Në Britaninë e Madhe është shtuar frika mbi të ardhmen e lidershipit aktual të qeverisë, pasi kryeministri Boris Xhonson po kurohet intensivisht për simptomat e rënduara të koronavirusit. Diplomati i parë i vendit është caktuar si zëvendësuesi i tij provizor.

Kryeministri britanik, Boris Xhonson, ka kaluar natën e dytë në spital, në gjendje të rënduar shëndetësore nga koronavirusi.

Të hënën në mbrëmje, konservatori 55-vjeçari iu nënshtrua terapisë intensiv në një spital të Londrës, pasi simptomat e tij u përkeqësuan.

Ministri i Jashtëm, Dominik Rab, është caktuar si zëvendësues i përkohshëm i Xhonsonit.

“Në këto rrethana, kryeministri më ka kërkuar ta zëvendësoj kurdoherë të jetë e nevojshme që të përmbush planet e qeverisë për mposhtjen e koronavirusit. Ekzekutivi vijon të funksionojë ndërsa kryeministri është në duart e sigurta të ekipit të shkëlqyer të spitalit të Shën Tomasit,” deklaroi kryediplomati i vendit.

46-vjeçari Rab, një ish-avokat i arsimuar në Oksford dhe Kembrixh tha se mbretëresha e vendit, Elizabeta e Dytë, po informohet vazhdimisht për gjendjen e kryeqeveritarit.

Liderët botërorë, nga presidenti i Amerikës, Donald Trump, te ai francez dhe personalitete të huaja kanë uruar shërimit e shpejtë të Xhonsonit.

Muajin e kaluar, ai do të deklaronte se e kishte nënvlerësuar rrezikun e pandemisë, dhe me gjasë e kishte bartur atë nga pacientë të infektuar.

“Natën e kaluar isha në spital, ku kishte disa pacientë me koronavirus, dhe i dhashë dorën të gjithëve dhe vijoj t’u jap dorën njerëzve sepse e mendoj të rëndësishme. Por sigurisht secili duhet të veprojë me mendjen e vet,” u shpreh Xhonson më 3 mars kur pandemia në vend po përhapej më shumë.

Deri të dielën, publikisht ishte njoftuar se simptomat e tij nga koronavirusi ishin të lehta, por problematike shfaqej temperatura e lartë dhe kollitja.

Në Britaninë e Madhe janë konfirmuar mbi 51 mijë raste infeksioni dhe më shumë se 5,300 viktima.