Kryetari Federatës së Futbollit të Kosovës (FFK), Agim Ademi gjatë ditës së sotme (e shtunë) ka vizituar stadiumin “Fadil Vokrri” në kryeqytet, aty ku i gjithë kombi përjetoi çaste lavdie e krenarie gjatë dy viteve të fundit nga djelmoshat tanë dardanë.

Përgjegjësi i stadiumit Benet Rezniqi e njoftoi presidentin Ademi për punët që janë bërë gjatë periudhës prej se janë ndalur aktivitetet sportive në vend për shkak të Coronavirusit Covid-19.

Në fakt, punëtorët e stadiumit nuk i kanë ndërprerë për asnjë ditë punimet në fushë, duke u kujdesur që ta bëjnë rikuperimin dhe mirëmbajtjen e saj.

Gjatë kësaj faze është rimbjellë një sasi e konsiderueshme e barit, derisa me udhëzimet e ekspertëve të kësaj fushe është bërë edhe hedhja e rërës dhe preparateve tjera të nevojshme në fushën e gjelbër.

Ndërkohë, brenda objektit është bërë pastrimi dhe dezinfektimi i të gjitha ambienteve.

Kësisoj, stadiumi ‘Fadil Vokrri’ do të jetë plotësisht i gatshëm dhe në nivelin më të mirë për ndeshjet e Kombëtares në muajt e vjeshtës së ardhshme.