Po bëhen shumë vite prej se VV-ja vazhdimisht e përmend një marrëveshje sekrete në mes Hashim Thaçit dhe Serbisë, marrëveshje të cilën dje e mohoi Departamenti Amerikan i Shtetit. Nga kjo, lind pyetja, pse nuk po jetësohet kjo marrëveshje nëse po ekzistoka dhe e paska përkrahjen e SHBA-ve? Përgjigjen është mirë të na jap VV-ja. Gjithashtu, lind pyetja se, ne, qytetarët, a duhet ta konsiderojmë mik apo armik SHBA-në, nëse po e përkrahka një marrëveshje sekrete dhe të dëmshme për Kosovën ? Këtë gjë është mirë të na tregojë VETËVENDOSJA!

Qytetarët duhet ta kenë të qartë se, asnjë marrëveshje nuk mund të miratohet pa përkrahjen e Kuvendit të Republikës së Kosovës. Prandaj, nëse ekziston një marrëveshje e tillë, atëherë Albin Kurti nuk duhet të ikë nga përgjegjësia që i’a kanë dhënë qytetarët. Ai është dashur ta bllokojë këtë marrëveshje në Kuvendin e Republikës së Kosovës nëse do tentonte të kalonte. Këtë e ka deklaruar vetë Albin Kurti para zgjedhjeve, duke thënë se ky do të jetë shpëtimtari i Kosovës dhe ai i cili do ta ndalojë një marrëveshje sekrete që është në dëm të Kosovës.

Ku mbeti shpëtimtari i Kosovës, ku mbeti Albin Kurti që ta ndalojë një marrëveshje sekrete që është në dëm të Kosovës?

Edhe një gjë duhet pasur parasysh: Në Kuvendin e Republikës së Kosovës ka shumë deputetë të cilët ishin pjesëtarë të Ushtrisë Çlirimtare të Kosovës; Ka deputetë që i kanë të vrarë e të zhdukur familjarët e tyre; Ka deputetë të cilët ishin të burgosur e të përndjekur nga Serbia. Kështu që, një marrëveshje që është në dëm të Kosovës nuk ka gjasa të kalojë në Kuvendin e Republikës së Kosovës nga këta deputetë.

Prandaj, nëse VV-ja po mundohet ta arsyetojë ikjen nga përgjegjësia, duke paralajmëruar një “marrëveshje sekrete”, është një gabim i madh, sepse qytetarët nuk i votuan për të dezertuar dhe ikur nga përgjegjësitë që i kanë.