Zëvendëskryeministri i parë i Kosovës, Avdullah Hoti thotë Planprogrami Qeverisës i miratuar sot reflekton plotësisht marrëveshjen për koalicion.

Hoti me anë të një postimi në rrjetin social Facebook deklaroi se programi do të dorëzohet në Kuvendin e Kosovës për informim të deputetëve.

“Sot, në mbledhjet e pestë të Qeverisë, kemi miratuar Programin Qeverisës për mandatin 2020-2023. Në këtë program është reflektuar plotësisht marrëveshja e koalicionit, si dhe janë vendosur objektiva të tjera që prekin jetën e të gjitha komuniteteve në Kosovës”.

“Tash, bazuar në Programin Qeverisës, secila ministri do të përgatisë planet e punës së tyre ku do të listohen masat konkrete që do të ndërmerren nga secila ministri, së bashku me buxhetin përkatës, për të realizuar objektivat e parapara”.

“Në ditët në vijim do të jemi në komunikim të hapur me shoqëri civile, medie, biznese dhe grupe të tjera për të prezantuar këtë program. Programi do të dorëzohet në Kuvendin e Kosovës për informim të deputetëve”, ka shkruar Hoti.