Zëvendëskryeministri i parë i Kosovës Avdullah Hoti, përmes një postimi në facebook ka deklaruar se nuk do të lejojnë paralizimin e institucioneve të reja të Kosovës karshi Shteteve të Bashkuara të Amerikës, për shkak të kauzave pseudopolitike, siç është tarifa ndaj mallrave serbe, raporton arbresh.info.

Sipas tij, një gjë e tillë i lë hapësirë Serbisë të dëmtojë pozitën ndërkombëtare të Kosovës.

 Ky është postimi i plotë i tij:

 “Angazhimi i Serbisë për defaktorizimin e subjektivitetit të Kosovës është sistematik, që tregon se ajo është kundër marrëveshjes për normalizim. Kjo nuk është gjë e re.

I ri është konteksti politik në Kosovës, ku institucione e reja që kanë legjitimitet të plotë qytetarë tani marrin përsipër agjendën e dialogut dhe politikës së jashtme.

Është e qartë se kjo agjendë e qeverisë së re mund të ketë sukses vetëm në koordinim SHBA dhe BE.

Paralizimi eventual i institucioneve të reja të Kosovës karshi këtyre temave për shkak të kauzave pseudopolitike, siç është tarifa, na shpie në getoizim.

Ne nuk do të lejojmë getoizimin e Kosovës, sepse kjo i lë hapësirë Serbisë të dëmtojë pozitën tonë ndërkombëtare.”, ka shkruar Hoti./arbresh.info/