Më 10 shkurt të vitit 2006, Fatmir Sejdiu u zgjodh president i Kosovës.

Ku me 80 vota për, 12 kundër dhe 17 të pavlefshme, Sejdiu mori postin e kryetarit të vendit.

Sejdiu ishte kandidati i vetëm i propozuar nga Lidhja Demokratike e Kosovës që ta vazhdonte mandatin e ish-kryetarit Ibrahim Rugova deri në zgjedhjet e ardhshme parlamentare.

Por, mandatin e tij pesë vjeçar, Sejdiu nuk mundi ta përfundonte ashtu siç është e paraparë edhe me Kushtetutë të Kosovës.

Më 27 shtator të vitit 2010, ai dha dorëheqjen e tij nga ky posti i presidentit pasi një vendim i Gjykatës Kushtetuese konstatonte se Sejdiu kishte bërë shkelje të rëndë të Kushtetutës me mbajtjen e postit të presidentit dhe atij të kryetarit të LDK-së, ndonëse me funksione të ngrira.

Sejdiu e bëri publik vendimin e tij për dorëheqje gjatë një konference për media ku tha se postin e presidentit e kishte ushtruar me përgjegjësi dhe përkushtim të plotë.

Ai u shpreh se vendimin për dorëheqje e kishte marrë pikërisht për të respektuar Gjykatën Kushtetuese si instanca më e lartë të interpretimit të Kushtetutës së Kosovës./arbresh.info/