Banka e Anglisë do të shqyrtojë se si Britania e Madhe mund të adoptojë kritpovalutë të stilit Bitcoin, si pjesë e një grupi botëror të bankave qendrore që janë bashkuar së bashku për të shqyrtuar pengesat e mundshme të mbështetjes në paratë dixhitale.

Zyrtarët e bankës do të takohen me Bankën e Japonisë, Bankën Qendrore Evropiane, Sveriges Riksbank, Bankën e Kanadasë, Bankën Kombëtare Zvicerane dhe Bankën për Zgjidhje Ndërkombëtare për të analizuar përvojat dhe potencialet për një monedhë dixhitale.

Zëvendësguvernatori i Bankës së Anglisë, Jon Cunliffe pritet ta bashkëkryesojë grupin me Benoît Cœuré, një ish-anëtar i bordit të Bankës Qendrore Evropiane.

Planet e Facebookut për kriptovalutën e saj kanë tërhequr vëmendjen e rregullatorëve dhe të bankave qendrore në të gjithë botën, përcjell Telegrafi.

Ideja e një monedhe dixhitale të bankës qendrore është përfolur gjithnjë e më shumë në të gjithë botën për të ndihmuar në përmirësimin e sistemeve të pagesave dhe transaksioneve ndërkufitare.

Banka tha që grupi i ri i punës do të shikojë në rastet e përdorimit të kësaj monedhe; zgjidhje të projektimit ekonomik, funksional dhe teknik, përfshirë ndërveprimin ndërkufitar.