Pas refuzimit të ofertës së LDK-së për koalicion, Lëvizja Vetëvendosje do të lidh “koalicion me qytetarët që e duan çkapjen e shtetit”, ka thënë sot Haki Abazi, anëtari i Lëvizjes Vetëvendosje.

Abazi, i cili u anëtarësua në Lëvizjen Vetëvendosje rreth dy javë më parë, është shprehur se Vetëvendosje dhe koalicioni i saj, siç ka thënë ai, me qytetarët, është “tiketa e vetme që meriton votën qytetare”.

“Albin Kurti dhe LVV e kanë kryer detyrën kombëtare me ofertën e bërë drejt LDK, tani koalicioni LVV me qytetarët qe e duan shtetin e çkapur dhe demokracinë funksionale është tiketa e vetme që meriton votën qytetare”, ka deklaruar Abazi.

Lidhja Demokratike e Kosovës ka refuzuar sot ofertën e liderit të VV-së, Albin Kurti, për koalicion mes dy partive. Oferta e Kurtit parashihte krijimin e një liste të përbashkët parazgjedhore mes dy partive, pa caktuar kandidat për kryeministër.

Ndërkaq, sot Albin Kurti ka refuzuar marrëveshjen për koalicion mes Lëvizjes Vetëvendosje dhe Alternativës.

Kryetarja e Alternativës, Mimoza Kusari Lila, ka konfirmuar sot se nuk është arritur një marrëveshje mes partisë së saj dhe Vetëvendosjes për një koalicion parazgjedhor.

https://www.facebook.com/haki.abazi/posts/10156379133885718