Lëvizja FOL bën të ditur se kanë filluar hetimet nga Prokuroria Speciale e Republikës së Kosovës për kontratën e ndërtimit të auto-udhës Prishtinë – Gjilan – Dheu i Bardhë.

Nga FOL thonë se që nga viti i kaluar përmes kërkesës për qasje në dokumente publike ka kërkuar të gjithë dosjen e kësaj kontrate, mirëpo përveç një pjese të dokumentacionit iu ishte ofruar pjesa tjetër, siç thonë se i kanë informuar zyrtarët e Ministrisë së Infrastrukturës nuk ekzistonte.

“FOL është informuar nga Institucioni i Avokatit të Popullit, përmes një vendimi të datës 01 gusht 2019, mbi fillimin e hetimeve të Prokurorisë Speciale të Republikës së Kosovës për kontratën e ndërtimit të auto-udhës Prishtinë – Gjilan – Dheu i Bardhë, apo e njohur në gjuhën teknike si: “Kontrata për ndërtimin e auto-udhës A7.1 – Kryqëzimi në disnivel A6/A7.1 (Banullë) – Dheu i Bardhë””, thonë nga FOL.

Më tej ata thonë se vendimi i Institucionit të Avokatit të Popullit, përmes së cilit njoftoheni se ky institucion i ndërprenë hetimet pas fillimit të hetimeve nga Prokuroria Speciale, rrjedh si rezultat i paraqitjes së ankesës nga ana e Lëvizjes FOL për mos ofrim të disa dokumenteve të kontratës nga ana e Ministrisë së Infrastrukturës, gjegjësisht mos ofrimin e Planit të Menaxhimit të Kontratës, të cilën tashmë dihet se nuk e posedon kjo ministri.