Ish-kryeministri Sali Berisha denoncon plantacionet me kanabis në Smokthinë të Vlorës.

Përmes një fotoje të publikuar në rrjetin social Facebook, Berisha thotë se sinjalizimi ka ardhur nga një qytetar i cili ka fotografuar sipas tij parcelat me drogë në këtë zonë të thellë të Lumit të Vlorës.

Edhe në këtë rast deputeti demokrat akuzon ministrin e Punëve të Brendshme Saimir Tahiri, duke lënë të nënkuptuar se këto parcela nuk janë asgjësuar nga policia pasi janë nën mbrojtjen e ministrit, të cilin Berisha e quan “Saimir Shullazi”.

“Fotografi dixhital denoncon plantacione masive kanabisi në Smokthinë, arat e Sajmir Shullazit”, – shkruan Berisha.

Edhe lideri i opozitës Lulzim Basha ka denoncuar më herët përmes fotove në Facebook, se policia nuk po asgjëson parcelat me kanabis në fshatin e origjinës së Tahirit në Tepelenë, por vetë ministri reagoi duke thënë se bëhej fjalë për montazh, pasi Basha sipas tij kishte fshirë nga fotot efektivët që po asgjësonin drogën.