Deputetja e PSD-së, Shqipe Pantina, në emër të kësaj parti thotë se kanë propozuar tarifë prej 20 eurosh në vit për RTK-në, duke vlerësuar se vetëm në këtë mënyrë  mediumi i vetëm publik mund të ndahet nga mbikëqyrja e shtetit, shkruan arbresh.info.

“Në Kuvend ka kaluar në lexim të parë Ligji për RTK-në. Deri tash e dimë se ky medium ka shërbyer vetëm për pushtetin. PSD mendon se RTK duhet të jetë medium publik dhe i pavarur. Pa pavarësi financiare të RTK -së nuk mund të ketë pavarësi editoriale e menaxheriale. PSD propozon që RTK me hyrje në fuqi të ligjit të ri, të financohet drejtpërdrejt nga qytetarët përmes një tarife prej 20 euro në vit”.

Sipas deputetit të PSD-së, Dukagjin Gorani, ajo çka e dallon një medium publik nga ai shtetëror është pikërisht pavarësia editoriale.

“Ajo që e dallon një mediumi publik nga ai shtetëror është pavarësia editoriale. Një nga mënyrat e zgjidhjes është edhe rimendimi se si përzgjidhet bordi i RTK-së. Nga 11 sa janë, duhet të zvogëlohet në 7 ky bord. Vetëm mënyra e financimit nga qytetarët do të shpëtonte RTK-në nga pushteti. Problem kryesor i RTK-së deri tash ka qenë emërimi i anëtarëve të bordit nga përzgjedhjet politike”./arbresh.info/