Organizata e Kombeve të Bashkuara (OKB) ka njoftuar se një në çdo 5 persona në zonat e luftës vuan nga sëmundjet mentale, transmeton Anadolu Agency (AA).

“Rreth 22 për qind e njerëzve në zonat e luftës vuajnë nga depresioni, ankthi ose çrregullimi pas-traumatik. Këtë e tregon analiza e 129 studimeve të botuara në revistën mjekësore The Lancet“, thuhet në njoftimin e OKB-së.

Studimi po ashtu, tregoi se pothuajse çdo i 10 person në zonat e luftës vuan nga sëmundjet e mesme apo të rënda mentale.

“Duket se shkalla e të sëmurëve nga depresioni dhe ankthi është gjithnjë më e madhe te njerëzit më të moshuar. Depresioni është më i zakonshëm tek gratë”, theksohet në njoftim.

Sipas OKB-së, në vitin 2016, ka patur 53 konflikte në 37 vende të botës. Kjo do të thotë se një rekord prej 12 për qind e popullsisë së botës jetonte në zonat e luftës.

Në botë, atë vit ka patur 69 milionë persona të zhvendosur të detyruar, një numër rekord që nga fundi i Luftës së Dytë Botërore.