Klubi i Prodhuesve të Kosovës kërkon nga Qeveria e Shqipërisë të heq barrierat tregtare që ata thonë se i hasin gjatë eksportit të produkteve.

Kjo u bë e ditur në njoftimin e dërguar nga ky klub.

Ata thonë se është e papranueshme që pengesat të jenë ende të zbatueshme, pasi sipas tyre kanë bërë disa herë kërkesa.

“Barrierat kryesore për prodhuesit kosovar po hasin gjatë eksportit në tregun e Shqipërisë janë barriera tarifore dhe jo-tarifore, ku në çdo eksport, autoritetet shqiptare kërkojnë Certifikatën e Cilësisë për produktet që i nënshtrohen kontrollit fitosanitar dhe veterinar”.

“Pastaj procedurat e zhdoganimit në Shqipëri, pagesa e skanerit, noterizimi i analizave, pagesa në rrugën e kombit, mos-marrja për bazë e çmimit të faturës nga Dogana Shqiptare, zbatimi i normës të lartë të akcizës janë disa nga pengesat të cilat e rrisin koston e prodhimit por edhe e ulin nivelin e konkurrueshmërisë së produkteve të Kosovës në tregun e Shqipërisë”, thuhet në këtë komunikatë.

Ky Klubi i Prodhuesve të Kosovës i bën thirrje Qeverisë së Shqipërisë që sa më parë të bëjë shqyrtimin e të gjitha kërkesave të prodhuesve kosovarë.