Sergio Ramos deri më tani ka luajtur 41 herë në El Clasico dhe është afër një numri rekord të paraqitjeve mes Barcelonës dhe Real Madridit.

Rekordi aktualisht mbahet nga ish-mbrojtësi i klubit mbretëror, Manuel Sanchis, i cili është paraqitur në 43 ndeshje të një prej derbive më të mëdhenj në botë.

Para Ramosit janë edhe Francisco Gento, ish-lojtar i madrilenëve si dhe ish-mesfushori i Barcelonës, Xavi, ku secili ka nga 42 ndeshje.

Interesante, Ramos do të jetë në gjendje të arrijë Sanchisin në muajin e ardhshëm sepse më 27 shkurt luhet ndeshja kthyese e gjysmëfinaleve të Kupës dhe më 2 mars në kalendar është takimi në kuadër të La Ligës.

Ramos debutoi në El Clasico në vitin 2005 në një takim ku Barcelona festoi në Santiago Bernabeu pas triumfit 3-0.

Në 41 paraqitje e gjertanishme, futbollisti 32-vjeçar shënoi katër gola, por u ndëshkua me pesë kartonë të kuq.

Ndryshe, Lionel Messi është lojtari më i mirë në El Clasico, ku në 40 paraqitje shënoi 26 gola.