Lazio është kualifikuar në gjysmëfinale të Kupës së Italisë duke fituar në penalti kundër Interit.

Skuadra nën udhëheqjen e Simone Inzaghis eliminoi me anë të penaltive nikoqirët e këtij takimi dhe ylli shqiptar Thomas Strakosha është heroi i tyre për shkak se priti dy penalti, shkruan portali arbresh.info.

Lazio kaloi në epërsi gjatë vazhdimeve duke shënuar përmes sulmuesit Ciro Immobile në minutën e 108′, por kur të gjithë mendonin se ka përfunduar gjithçka në Giusseppe Meazza, nikoqirët përfituan një penaltia.

Gjyqtari Rosrio Abisso akordoi penalti në minutën e dytë të kohës shtesë (122′) dhe sulmuesi argjentinas Mauro Icardi realizoi nga pika e bardhë për 1 me 1 në përballjen direkte me portierin shqiptar Thomas Strakosha duke dërguar kështu ndeshjen në penalti.

Portieri i Kombëtares Shqiptare priti goditjen e superyllit Radja Nainggolan dhe Lautaro Martinezit në penalti pas 120 minutave lojë duke dërguar kështu në gjysmëfinale të këtij kompeticioni skuadrën e tij.

Te Lazio, të saktë me goditjen e tyre u treguan të gjithë ekzekutuesit përveç Riza Durmisit./arbresh.info/