Bashkimi Evropian (BE) ka njoftuar se mbështet vazhdimin e negociatave për anëtarësimin e Turqisë në BE, raporton Anadolu Agency (AA).

Zëdhënësi i Komisionit të BE-së, Margaritis Schinas, në një konferencë për shtyp, i është përgjigjur pyetjes së gazetares së AA-së, nëse reflekton qëndrimin zyrtar të Komisionit të BE-së, qëndrimi i komisonerit Johannes Hahn, se “duhet të ndërpriten negociatat e anëtarësimit të Turqisë”.

Pasi ka nënvizuar se qëndrimi zyrtar i Komisionit të BE-së mund të shprehet “vetëm dhe vetëm” nga presidenti Jean-Claude Juncker, zëdhënësi Schinas, tha se “Qëndrimi zyrtar i Komisionit të BE-së është në drejtimin për vazhdimin e negociatave të pranimit të Turqisë”.

Schinas, ka rikujtuar se presidenti Juncker dhe presidenti i Këshillit të BE-së, Donald Tusk në Samitin BE-Turqi i cili u mbajt më 26 mars në qytetin Varna të Bullgarisë kanë vënë theksin në procesin e reformave dhe rëndësinë e marrëdhënieve të mira fqinjësore të Turqisë. Për këtë është e nevojshme që të mbahen të hapura kanalet e komunikimit me Turqinë dhe të vazhdohen negociatat e anëtarësimit”.

Komisioneri i BE-së për Zgjerim, Johannes Hahn, në një intervistë për gazetën gjermane “Die Welt” ishte shprehur se Turqia dhe BE-ja duhet të gjejnë “rrugë të reja” dhe kishte mbrojtur idenë e tij se duhet të ndërpriten negociatat e anëtarësimit të Turqisë.

Duke bërë të ditur se anëtarësimi i Turqisë në BE nuk do të realizohet “në një të ardhme të afërt”, Hahn kishte theksuar se negociatat pengojnë “formimin e një partneriteti të vërtetë strategjik”.