Nënkryetari i Komunës së Malishevës, Hajdin Berisha, i shoqëruar nga drejtori për shëndetësi Liridon Hoti dhe ai për buxhet, Valon Mazreku, sot kanë vizituar pacientët nga Malisheva, të cilët janë në dializë dhe këtë shërbim e marrin në spitalin rajonal në Prizren.

Berisha, është njoftuar me gjendjen e tyre dhe me shërbimin që iu ofrohet, përfshi edhe transportin e tyre, të cilin e siguron Komuna e Malishevës.

Gjatë kësaj vizite në  spitalin rajonal në Prizren, nënkryetari i Komunës së Malishevës dhe Hoti e Mazreku, janë takuar me pacientët që sot ishin duke e marrë këtë shërbim, me të cilët kanë biseduar rreth kushteve dhe trajtimit që ju ofrohet, e në veçanti për transportin që ju sigurohet nga komuna.

Pacientët në dializë, të cilët trajtohen, janë ndarë të kënaqur me këtë vizitë, e po ashtu edhe me shërbimin që ju ofrohet atyre, kurse nënkryetari Berisha, ka premtuar se Komuna e Malishevës, do të vazhdoj të kryej këtë shërbim për pacientët në dializë.

Në Komunën e Malishevës, janë 23 persona në dializë dhe shërbimin shëndetësor e marrin në rregullisht, transmeton Klan Kosova.