Deputeti i Kuvendit të Kosovës nga radhët e Alternativës, pjesë e Grupit Parlamentar të Lidhjes Demokratike të Kosovës, Ilir Deda, i ka dhënë një goditje presidentit të vendit, Hashim Thaçi, teksa ka thënë se ai po i përqafon planet e diktatorit të vdekur serb, Sllobodan Millosheviq, për shkatërrimin e Kosovës.
Deda ka vlerësuar se asnjë president i Kosovës “me aq (mendje)lehtësi dhe dëshirë” nuk i ka kontestuar kufijtë e shtetit të vet.

“Nuk ka pas President në Kosovë që me aq (mendje)lehtësi dhe dëshirë i ka kontestuar kufijtë e shtetit të vet, e që me betimin e vet duhet t’i mbrojë. Secili duhet ta ketë të qartë që “korrigjimi i kufijve” është eufemizëm për ndarje të Kosovës, dhe asgjë tjetër. Mbyllja e syve para tmerrit që po e pret Kosovën, i bën të gjithë bashkëpjesëmarrës në shkatërrimin e shtetit tonë – sipas planeve të Millosheviqit të vdekur – që po i përqafon Kryetari i tanishëm i Kosovës”, ka shkruar Deda në llogarinë e tij në Facebook.

Hashim Thaçi sot ka shkruar në Facebook se do të ketë korrigjim të kufijve, teksa ka theksuar se assesi s’do të ketë ndarje të Kosovës.