Lego ka prezantuar Smart Bricks – versione të mbushura me teknologji të blloqeve të saj të vogla ndërtimi – të cilat thotë se do t’i japin jetë seteve me tinguj, dritë dhe reagim ndaj lëvizjes.

Megjithatë, gama e re e produkteve ka marrë një reagim të përzier nga ekspertët e lojës, të cilët thonë se rrezikon të minojë atë që e bën Lego-n të dallueshëm për fëmijët në një botë gjithnjë e më digjitale.

I njoftuar në CES 2026 në Las Vegas, sistemi Smart Play i prodhuesit danez të lodrave prezanton komponentë të rinj elektronikë në blloqet klasike plastike.

Lego thotë se produktet e saj të reja të pajisura me teknologji, të lansuara në mars me një set të ri Star Wars, janë “risitë e saj më revolucionare” në gati 50 vjet, transmeton Telegrafi.

Por Josh Golin, drejtor ekzekutiv i grupit të mirëqenies së fëmijëve Fairplay, beson se Smart Bricks mund të “minojë atë që dikur ishte e mrekullueshme për Lego-t” – shfrytëzimin e imagjinatës së fëmijëve gjatë lojës.

Ai tha se lodra nuk kërkonte karakteristika shtesë për të gjeneruar tinguj ose efekte të tjera.

“Siç e di kushdo që ka parë ndonjëherë një fëmijë të luajë me Lego të stilit të vjetër, krijimet e fëmijëve me Lego lëvizin dhe bëjnë zhurma nëpërmjet fuqisë së imagjinatës së fëmijëve”, i tha ai BBC-së.

Andrew Manches, profesor i fëmijëve dhe teknologjisë në Universitetin e Edinburgut, u pajtua se bukuria e Lego qëndron në “lirinë për të krijuar, rikrijuar dhe përshtatur blloqe të thjeshta në histori të pafundme të mundësuara nga imagjinata e fëmijëve”.

Por ai gjithashtu mirëpriti përpjekjet e Lego për të integruar lojën fizike dhe digjitale me mjete që reagojnë ndaj mënyrës se si fëmijët bashkëveprojnë me produktet e saj Smart Play.

Julia Goldin, drejtoresha e produktit dhe marketingut të kompanisë, i tha më parë BBC-së se e shihte teknologjinë digjitale si një mundësi për të “zgjeruar lojën fizike dhe ndërtimin fizik”.

“Ne nuk e shohim botën digjitale si një kërcënim”, tha ajo – duke shtuar se gama e saj inteligjente ndërthur ndërveprimin “në mënyrë të përsosur” me produktet e saj fizike.

Lego thotë se Smart Bricks e saj mund të ndiejnë lëvizjen, pozicionin dhe distancën, duke u lejuar modeleve të reagojnë në mënyra të ndryshme gjatë lojës.

Me përmasa 2×4, vetë tulla përmban sensorë, drita, një sintetizues të vogël zëri, një akselerometër dhe një çip silikoni të bërë me porosi që i mundëson asaj të zbulojë lëvizjen dhe të reagojë ndaj saj.

Por është projektuar për t’u përdorur me Smart Minifigures dhe Smart Tags pllaka – dy produkte shtesë që përbëjnë Sistemin e Lojës Inteligjente të Lego-s.

Të adaptuara në mënyrë të ngjashme nga komponentët ekzistues të Lego-s, këto posedojnë identifikues digjitalë që shkaktojnë tinguj ose reagime të ndryshme kur zbulojnë dhe bashkëveprojnë me njëri-tjetrin.

Për shembull, kur u provua nga BBC në CES, një tortë ditëlindjeje Lego njohu kur “qirinjtë” e saj u shuan – duke lëshuar një brohoritje dhe një këngë për ditëlindje.

Ndërkohë, një helikopter Lego bëri tinguj fishkëllimash kur lëvizte ose rrotullohej, me Smart Brick-un e tij që ndriçonte të kuq pas rrëzimit.

Tom Donaldson, kreu i Laboratorit të Lojës Kreative të Lego-s, tha se teknologjia kishte për qëllim t’u përgjigjej veprimeve të fëmijëve dhe të plotësonte mënyrën se si ata luajnë natyrshëm.

Ai tha se reagimet e Smart Brick-ut ndaj përgjigjeve “shpresojmë të frymëzojnë dhe surprizojnë përdoruesin që ata të vazhdojnë të luajnë”.