Kapiteni i Athletic Bilbao, Inaki Williams, ka shprehur hapur pakënaqësinë e tij për zhvillimin e Superkupës së Spanjës në Arabinë Saudite, duke e quajtur këtë vendim një turp për futbollin dhe tifozët.

Më 7 janar Athletic do të përballet me Barcelonën në gjysmëfinale të Superkupës. Gjysmëfinalja tjetër do të luhet më 8 janar mes Real Madrid dhe Atletico Madrid. Superkupa e Spanjës zhvillohet në Arabinë Saudite prej gjashtë vitesh.

“Është e vështirë për tifozët të organizojnë udhëtimin dhe ndihesh sikur po luan gjithmonë jashtë fushe”, është shprehur sulmuesi i Athletic.

Williams ka treguar se është i shqetësuar edhe për arsye personale, pasi gruaja e tij është në një fazë të avancuar të shtatzënisë dhe mund të lindë nga momenti në moment. “Është e vështirë të lë gruan dhe djalin tim këtu”, e ka pranuar ai, duke shtuar se megjithatë mbetet në dispozicion të klubit dhe do të përpiqet të japë maksimumin në Superkupë.