Trepça ka arritur të reagojë pas humbjes në ndeshjen e parë të finales së “Play-off” në Superligën e Kosovës në basketboll, duke triumfuar ndaj Bashkimit dhe duke barazuar serinë finale në 1:1.

Ndeshja e zhvilluar të mërkurën mbrëma ka qenë e balancuar dhe dramatike deri në fund, por “Xehetarët” kanë arritur t’i kontrollojnë momentet vendimtare të sfidës, duke fituar me rezultat të ngushtë.

Trepça e ka nisur ndeshjen më mirë, duke krijuar epërsi prej shtatë pikësh, por Bashkimi është përgjigjur dhe pas çerekut të parë rezultati ka qenë i barabartë 20:20. Edhe periudha e tretë ka përfunduar në barazim, 17:17, dhe pas tridhjetë minutash lojë shifrat kanë qenë 58:58.

Vendimtare është treguar pjesa e fundit e ndeshjes, ku mitrovicasit janë shkëputur në 69:64. Prizrenasit janë afruar deri në 73:71 dy minuta para fundit, por nuk kanë arritur ta përmbysin. Trepça e ka ruajtur qetësinë dhe e ka rikthyer epërsinë prej shtatë pikësh në fund, diferenca më e madhe e ndeshjes.

Më të mirët në radhët e Trepçës kanë qenë Tekele Cotton me 22 pikë dhe tetë asistime, Michael Myers me 22 pikë e nëntë kërcime, si dhe Drilon Hajrizi me 15 pikë e shtatë kërcime.

Në anën tjetër, për prizrenasit janë dalluar Lejson Zeqiri dhe Dirk Williams me nga 16 pikë, ndërsa Jayveous McKinnis shtoi 12 pikë dhe 10 kërcime.

Finalja e tretë do të zhvillohet të dielën në Prizren, ndërsa skuadra që arrin katër fitore shpallet kampione e Kosovës./RTK