Në prag të ndeshjes Manchester United – Arsenal në kuadër të kupës FA, menaxheri i United,  Louis Van Gaal ka deklaruar se për skuadrën e tij, më e rëndësishme është të kualifikohet sezonin e ardhshëm në Ligën e Kampionëve, sesa triumfimi në kupën FA.
Gara për të siguruar një pozitë në top-katërshe është shumë e nxehtë, pasi që diferenca mes Arsenalit, që është në pozitën e tretë dhe Tottenhamit që është në pozitën e gjashtë është vetëm katër pikë.

United është në pozitën e katërt, që siguron kualifikimet për Ligën e Kampionëve, por tani do të ndeshet me Arsenalin në kuadër të kupës FA, me Van Gaalin që insiston se Premier Liga është prioritet i tij.

“Kur e fiton kupën FA nuk je në Ligën e Kampionëve, por ke fituar një trofe. Për lojtarët, kjo gjë është fantastike, edhe për menaxherët njësoj, por synimi ynë është që në vitin e parë së bashku të sigurojmë një vend në Ligën e Kampionëve”, ka thënë Van Gaal.
“Liga e Kampionëve është niveli më i lartë i futbollit. Mendoj se të përfundojmë në top katërshe do të ishte rezultat fantastik për klubin tonë”, ka theksuar holandezi.