Kombëtarja e Argjentinës do ta ketë shumë të vështirë pa Lionel Messin, pasi sipas statistikave, kombëtarja ka përqindje tejet të dobët të fitoreve pa yllin e Barcelonës në skuadër, shkruan Goal.

29-vjeçari dje mori dënimin e rëndë nga FIFA, duke u pezulluar me katër ndeshje, për shkak të ofendimeve që i bëri gjyqtarit anësor në fundin e ndeshjes me Kilin.

Por ky dënim i yllit të Barcelonës do të jetë një goditje e madhe për Argjentinën, sidomos për shpresat e tyre për t’u kualifikuar në Botëror.

Me Messin në ekip, Argjentina ka fituar pesë nga gjashtë ndeshjet e luajtura të vlefshme për kualifikim në Botëror, duke arritur përqindje të 83.3% të fitoreve kur ai ka luajtur.

Kurse pa të Kombëtarja argjentinase ka shënuar vetëm një fitore, në gjithsej 7 ndeshje të zhvilluara, duke arritur përqindje të ulët prej 14.3% të fitoreve.