Suhareka ka shprehur shqetësimin e saj lidhur me gjykimin e ndeshjes ndaj Gjilanit, duke akuzuar arbitrin kryesor Gramoz Shala dhe ekipin e arbitrimit për vendime të padrejta që, sipas klubit, kanë ndikuar drejtpërdrejt në rezultatin përfundimtar.

Në një reagim zyrtar, klubi suharekas ka kritikuar mosreagimin e arbitrave në një moment kyç të ndeshjes, ku pretendon se një lojtar i tij ishte ndaluar në mënyrë të parregullt gjatë një aksioni sulmues. Sipas Suharekës, as arbitri kryesor dhe as sistemi VAR nuk e kanë shqyrtuar situatën, pavarësisht se teknologjia ishte në dispozicion për të shmangur gabime të tilla.

“Kjo është e papranueshme dhe dëmton besueshmërinë e kampionatit. Nëse edhe me gjithë këto mjete teknologjike ndodhin gabime të tilla, atëherë çfarë masash duhet të ndërmerren për të siguruar një gjykim të drejtë?”, thuhet në deklaratën e klubit, i cili kërkon shqyrtim urgjent të rastit dhe shpjegim zyrtar për vendimet e marra nga arbitrat.

Ndeshja e luajtur në kuadër të Javës së 22-të të Superligës së Kosovës është mbyllur me fitoren e Gjilanit 2-1 në Suharekë. Po të njëjtën ditë, Suhareka ka njoftuar largimin e trajnerit Qendrim Kida. Aktualisht, ekipi ndodhet në vendin e gjashtë në tabelën e Superligës, e cila kryesohet nga Drita./rtk/