S’ka fitues në Olimpico, Roma dhe Milani kanë ndarë pikët, duk barazuar 1-1
Derbi i Italisë mes Romës e Milanit, ka përfunduar me barazim. Romakët dhe Kuqezinjtë kanë ndarë pikët në ndeshjen e zhvilluar në stadiumin Olimpico, e vlefshme për xhiron e 22 në Serie A.

Skuadrat dhuruan spektakël përgjatë 90 minutave, duke krijuar shanse të njëpasnjëshme, por gjetën portat vetëm nganjëherë.

Të parët në epërsi kaluan mysafirët, me golin e sulmuesit të sapo transferuar, Krzysztof Piatek – i cili ditë më parë i shënoi 2 gola edhe Napolit në Kupën e Italisë.

Ai realizoi për 0-1 në minutën e 26’, për ta dërguar Milanin në pushim të pjesës së parë me epërsinë e një goli.

Me të filluar pjesa e dytë, Roma gjeti golin e barazimit. Ishte talenti i ri italian, Nicolo Zaniolo, që realizoi për 1-1 në minutën e 46’, që doli të jetë rezultati përfundimtar i takimit, pavarësisht tentimit nga të dyja anët për t’i ndryshuar gjërat.

Pas këtij barazimi, Roma ka mbetur në pozitën e pestë me 35 pikë të grumbulluara, kurse Milani në atë të katërt me 36.