Mesfushori i Manchester City, Rodrigo Hernández Cascante (Rodri), është duke zhvilluar sezonin e tij të shtatë me klubin anglez.

29-vjeçari ka edhe një vit kontratë, por e ardhmja e tij mbetet e paqartë.

Në Manchester, ai ka përjetuar gjithçka: nga fitimi i të gjithë trofeve të mundshëm deri te një dëmtim shumë i rëndë në gju, që e detyroi të kalojë një periudhë të gjatë dhe të vështirë rikuperimi.

Pikërisht gjatë kësaj kohe, ai arriti të fitojë edhe çmimin prestigjioz Topin e Artë, ku në garë ishte edhe Vinícius Júnior.

Ky sezon ka qenë me ulje-ngritje për spanjollin, i cili ende nuk ka arritur formën e tij më të mirë. Megjithatë, ai ka nisur të tregojë sërish cilësitë që bënë Manchester City të paguajë 70 milionë euro për ta transferuar nga Atlético Madrid, ku nën drejtimin e Pep Guardiola është shndërruar në një nga mesfushorët më të mirë në botë.

Prej kohësh dihet se Real Madrid e ndjek nga afër dhe pritet të bëjë një ofertë të majme gjatë verës. Dyshimi i vetëm kishte të bënte me të kaluarën e tij te Atlético Madrid dhe faktin që vetë lojtari është deklaruar tifoz i këtij klubi.

Megjithatë, Rodri e sqaroi këtë çështje në një intervistë për emisionin “Radioestadio Noche”.

“Fakti që kam luajtur te Atlético Madrid nuk më pengon të luaj për Real Madridin. Ka shumë lojtarë që e kanë bërë këtë rrugë. Jo direkt, por me kalimin e kohës. Nuk mund të refuzosh klubet më të mira në botë.”

Kjo deklaratë shihet si një sinjal i qartë për hapjen e derës drejt “Santiago Bernabéu”. Sipas raportimeve, Real Madrid ka gati rreth 100 milionë euro për ta transferuar gjatë verës.

Fillimisht, madrilenët kishin në plan të afronin edhe Nico Schlotterbeck, por mbrojtësi gjerman është shumë pranë rinovimit me Borussia Dortmund, ndaj fokusi do të jetë te Rodri dhe më pas në varësi të shitjeve.

Ardhja e tij mund të sjellë ndryshime në mesfushë. Eduardo Camavinga përflitet për një largim të mundshëm këtë verë, pasi mediat franceze kanë raportuar prej javësh për interesim ndaj tij. Për më tepër, konkurrenca në skuadër është rritur edhe nga talentet e rinj si Thiago Pitarch.

Rodri nuk do të ishte i pari që vesh fanellën e dy klubeve më të mëdha të Madridit. Në të kaluarën, këtë hap e kanë bërë edhe Thibaut Courtois dhe Marcos Llorente. Ndërsa më herët, të njëjtën rrugë e kanë ndjekur edhe Álvaro Morata dhe legjenda Hugo Sánchez.

Nëse ky transferim realizohet, pritet të jetë një nga lëvizjet më të bujshme të merkatos së verës./Arbresh.info