Paris Saint-Germain dhe Juventus janë në bisedime të avancuara për një shkëmbim mes Layvin Kurzawas dhe Mattia De Sciglios.

Raportohet se negociatat po përparojnë me shpejtësi, me Kurzawan që është i etur për të kaluar te klubi nga Torino brenda ditëve të ardhshme.

L’Equipe dhe Sky Sport Italia shkruajnë se kjo marrëveshje mund të ketë një përfundim që në fundjavë.

Edhe eksperti i transferimeve, Gianluca Di Marzio e konfirmon të njëjtën gjë.

Arsenal kishte treguar gjithashtu interes të fortë për 27-vjeçarin francez, kontrata e të cilit me PSG-në do të skadojë në fund të sezonit.

Ai ka bërë vetëm 14 paraqitje në këtë vit me klubin parisien.

De Sciglio është gjithashtu 27 vjeçar dhe i çmuar te Juve, pasi mund të luajë në të djathtë dhe në të majtë të mbrojtjes.

Ish-produkti i akademisë së të rinjve të Milanit është i lënduar, por këtë vit ka luajtur në nëntë ndeshje për Bianconerët.