Me rastin e 105-vjetorit të Pavarësisë së Shqipërisë, siç është bërë zakon tashmë në kësi feste, u zhvillua në qytetin e Korçës “Kupa e Pavarësisë”.

Për ta bërë të vetin këtë trofe simbolik garuan 4 skuadra shqiptare: Liria e Prizrenit, Struga, Otranti i Ulqinit dhe Tirana. Në fund ka triumfuar Struga, e cila është skuadër shqiptare në Maqedoni, që militon në ligën e dytë të vendit tonë fqinj. Finalja u zhvillua mes Strugës dhe Otrant të Ulqinit dhe përfundoi në barazim, pa gola. Prandaj, u desh gjuajtja e penalltive për të shpallur fituesin. Struga u tregua më e saktë nga pika e bardhë e 11-metrashave dhe fitoi me rezultatin 4-1. Kësisoji, kjo skuadër fitoi edhe “Kupën e Pavarësisë” për vitin 2017. Struga fitoi fillimisht ndaj Tiranës 1-0, ndërsa finalisti tjetër, Otrant i Ulqinit, mundi 2-1 Lirinë e Prizrenit, të drejtuar nga Bledi Shkëmbi. Liria u laureua si ekipi “fair-play” i turneut, ndërsa Altin Loga i Strugës u shpall “Lojtari më i Mirë”. /Telesport