Bernard Challandes i është nënshtruar një operacioni në gju të martën.

Federata e Futbollit të Kosovës ka konfirmuar në uebfaqen e tyre zyrtare se trajneri i përfaqësues sonë i është nënshtruar më 3 korrik një operacioni në gju, shkruan portali arbresh.info.

Kryetari i FFK-së, Agim Ademi i ka uruar shërim të shpejtë Challandes me anë të një letre të publikuar:

Letra nga Agim Ademi:

Pas operimit që pati dje përzgjedhësi i Kombëtares sonë, Bernard Challandes, në gju, shfrytëzoj rastin që në emrin tim dhe në emër të Komitetit Ekzekutiv të Federatës së Futbollit të Kosovës t’ i uroj atij shërim sa më të shpejtë.

Roli i tij në ecurinë e ekipit tonë Kombëtar është shumë i rëndësishëm, prandaj ne e presim përzgjedhësin Challandes që të kthehet sa më i fortë në shtator kur na presin dy sfidat e radhës.

Zotit Challandes i urojmë shërim të shpejtë, shëndet të plotë e po ashtu vazhdimësi të rezultateve të mira me Kombëtaren tonë.

Agim Ademi,
President i FFK-së

Kosova luan në shtator ndeshjet e ardhme në kuadër të eliminatorëve për Kampionatin Evropian 2020./arbresh.info/