Ngasësi i talentuar shqiptar, Lirim Zendeli ka njoftuar se është tërhequr nga Formula 2 për shkak se mungesës së përkrahjes financiare për ta vazhduar garimin në këtë sport.

Në një njoftim në llogarinë e tij në ‘twitter’, Zendeli bëri të ditur lajmin pikëllues, shkruan arbresh.info

“Fatkeqësisht, kam një lajm pikëllues. Po largohem para kohës. Nuk do të jem në gjendje të vazhdoj në Formula 2 më, për arsye financiare. Pandemia ma ka zvogëluar edhe më shumë buxhetin edhe ashtu të vogël”, shkroi Zendeli në Twitter.

Zendeli i cili fitoi pikë në pesë gara në sezonin e tij debutues, 11 në përgjithësi ka thënë se do të bëjë përpjekje të mëdha për t’u kthyer në pistën e formulës sa më parë.

“Jam krenar se pata mundësinë të garoj në Formula 2, duke e ditur se vij nga një familje normale në aspektin financiar. Ta kuptoj se më duhet të tërhiqem është shumë e vështirë, por do të bëjë gjithçka për ta gjetur një mundësi për t’u kthyer në pistë sa më shpejt”, tha ai.

Përndyshe, Zendeli kishte debutuar këtë sezon në Formula 2 kategorinë e dytë të garës me formula  për ekipin MP Motosport. /arbresh.info/