Sëmundja ngjitëse që ka prekur thuajse gjithë botën së shpejti mund të përhapet edhe në Shtetet e Bashkuara të Amerikës.

Përderisa klubet evropiane po anulojnë ndeshje dhe në disa kampionate po luhet pa tifozë, një gjë e tillë ende nuk ka ndodhur në Amerikë në ndeshjet e MLS dhe NBA.

Por NBA i ka bërë të qartë klubeve se duhet të përgatiten që të luajnë edhe pa tifozë nëse është nevoja.

E për këtë temë është pyetur edhe basketbollisti i Los Angeles Lakers, LeBron James.

Ylli i skuadrës nga Kalifornia ka thënë se nëse merret një vendim i tillë që ndeshjet të luhen pa tifozë, ai atëherë nuk do të luaj fare.

“Ndeshjet pa tifozë? Jo. Është përgjigje e thjeshtë”, deklaroi James.

“Nuk do të luaj nëse nuk i kemi tifozët në tribuna, për ata luaj”, vazhdoi tutje James.

“Unë luaj për bashkëlojtarët e mijë, për tifozët. Nëse kemi ndonjë ndeshje ku nuk ka tifozë, atëherë unë nuk do të luaj”, deklaroi James i frustruar.

James shkëlqeu me fanellën e Lakers në fitoren ndaj Milwaukee Bucks 113:103 në një ndeshje ku ‘Mbreti’ realizoi 37 pikë.