Vedat Muriqi e pati një eksperiencë pozitive në La Liga, ku luajti për gjysmë sezoni në Mallorca.

Sulmuesi kosovar i realizoi 5 gola dhe i bëri 3 asistime në 16 ndeshje me klubin ishullor.

Me këtë rast, Mallorca e kishte mundësinë e blerjes definitive të kartonit të prizrenasit për 12 milionë euro.

Mirëpo, klubi spanjoll nuk është i gatshëm për ta bërë një gjë të tillë pasi nuk ka mundësi financiare.

Sipas mediave italiane, ishullorët mund t’i shpenzojnë maksimumi 8 milionë euro për ish-futbollistin e Fenerbahçes.

E kjo ofertë e iberikëve, sipas “Radiosei” është konsideruar e ulët dhe e papranueshme për Lazion, e cila e mban kartonin e lojtarit.

“Biancocelesti” i kërkojnë së paku 11 milionë euro për përfaqësuesin kosovar.

Drejtori sportiv Igli Tare ka qëndruar dje në Londër dhe nuk përjashtohet mundësia të ketë biseduar me drejtuesit e Hull Cityt, një tjetër klub i interesuar për Muriqin.

Por, as klubi anglez nuk i ofron më shumë se 10 milionë euro, edhe pse do të ishte vështirë e imagjinueshme që Muriqi të pranojë të luajë në divizionin e dytë të futbollit anglez.

Sidoqoftë, Lazio po mundohet ta sistemojë sa më shpejt sulmuesin shtatlartë, në mënyrë që ato para më pas t’i përdor për ndonjë përforcim.

Klubi nga Roma nuk e ka ndërmend ta mbajë me 28 vjeçarin, i cili dëshpëroi në eksperiencën e tij në “Olimpico”, ku për një vit e gjysmë i kishte realizuar vetëm dy gola dhe i kishte bërë dy asistime.

Interesim për Muriqin kanë shfaqur edhe dy gjigantët turkë, Galatasaray dhe Fenerbahçe

Lazio e kishte blerë Muriqin për afro 20 milionë euro nga Feneri në verën e vitit 2020, ndërsa lojtari ka kontratë me lazialët deri në vitin 2025. /arbresh.info/