Basketbollisti i njohur i GO+Pejës, Dardan Berisha, do të mungojë për një kohë të pacaktuar pas një lëndimi, njoftoi klubi pejan të hënën në rrjetet sociale.

Berisha nuk ishte prezent në humbjen e skuadrës ndaj Vëllaznimit të Gjakovës me rezultat 94:85, në kuadër të xhiros së 14-të të kampionatit. Ndërkohë, në ndeshjen e kaluar mes Bashkimit dhe Pejës, kapiteni u përball me një incident të pakëndshëm, ku u godit nga objekte të hedhura nga tifozët, duke pësuar një prerje në ballë.

“Kapiteni ynë, Dardan Berisha, ka pësuar një lëndim dhe do të mungojë për një kohë të pacaktuar. I urojmë rikuperim të shpejtë dhe kthim të shpejtë në parket,” shkruan klubi.

Berisha mbetet një nga lojtarët kryesorë të Pejës, dhe mungesa e tij pritet të ndihet shumë në vijën e lojës.