“Epoka e re e Milanit forcohet më tej me emrin e Paolo Maldinit, i cili bëhet drejtor i ri i zhvillimit strategjik sportiv të klubit”.

Kjo ishte komunikata e klubit të Milanit, duke zyrtarizuar rikthimin e kapitenit në “shtëpinë e tij”.

“Paolo është një legjendë e gjallë në historinë e kuqezinjve për klasin e tij të jashtëzakonshëm, talentin, udhëheqjen, besnikërinë dhe rekordin e suksesit, i cili është i pashembullt. Këto cilësi do të luajnë një rol vendimtar në rikthimin e Milanit përsëri aty ku meritojnë të jenë”, thuhet në komunikatën e Milanit.

Paolo Maldini zyrtarizohet kështu në stafin e ri drejtues të Milanit, duke u kthyer në atë që për 25 vite ka qenë shtëpia e tij sportive, shkruan TCH.

Të menjëhershme kanë qenë edhe reagimet nga ish-lojtarë e drejtues kuqezinj në mbështetje të Paolos. “Lajm i madh, mirë se u ktheve në shtëpi Paolo”, shkruan në “Twitter”, Franco Baresi. “Historia vazhdon! Mirë se u ktheve në shtëpi miku im!”, regoi Shevchenko.