Në grupin H Kroacia barazoi 2-2 ndaj Sllovakisë në Zagreb duke humbur vendin e parë për momentin që tashmë i takon Rusisë.

Schranz në minutën e 20-të shënoi me kokë pas krosimit të Hamsik nga goditja standarte golin që zhbllokoi shifrat. Kroatët reaguan shpejt dhe barazuan shifrat me Kramaric 5 minuta më vonë. Por atëherë kur nuk e prisnin u ndëshkuan nga Haraslin në minutën e 45-të.

Në sekondat e fundit të pjesës së parë Kroacia u ndal nga shtylla pas tentativës së Kramaric ndërkohë që golin e barazimit e gjeti me Luka Modric në minutën e 71-të, me kapitenin që shënoi direkt nga goditja standarte, edhe me pak fat pasi muri i sllovakëve u hap në momentin e fundit.

Në minutën e 83-të kroatëve iu anulua një gol nga var për pozicion jashtë lojë i Nikola Vlasic.

Me këtë barazim Kroacia u ngjit në kuotën e 17 pikëve, ndërkohë që në krye të grupit tashmë është Rusia me 19 pikë që mori një fitore të madhe në transfertën ndaj Sllovenisë me shifrat 1-2.