Juventusi ka zyrtarizuar nënshkrimin e anësorit Francisco Conceição me një kontratë të përhershme nga Porto, pas një huazimi të suksesshëm gjatë sezonit 2024-25 në Torino.

22-vjeçari u bashkua me “Zonjën e Vjetër” në një huazim të drejtpërdrejtë për sezonin 2024-25, i cili më pas u zgjat deri në përfundimin e Kupës së Botës për Klube të FIFA-s.

Tashmë ai ka firmosur një kontratë pesëvjeçare që do ta mbajë në klub deri në verën e vitit 2030.

Juventusi ka konfirmuar se marrëveshja me Porton kap vlerën e 30.4 milionë eurove, të cilat do të paguhen në katër këste.

Reprezentuesi portugez bëhet përforcimi i dytë i përhershëm i Juventusit gjatë kësaj vere, pas transferimit të Jonathan David si lojtar i lirë në fillim të korrikut.

Në deklaratën zyrtare të klubit thuhej:

“Francisco Conceição është zyrtarisht lojtar i Juventusit me një kontratë të përhershme. Pas sezonit 2024/25 të kaluar në huazim nga FC Porto, anësori portugez ka firmosur një marrëveshje që e lidh me Bianconerët deri në vitin 2030.”

“Transferimi vjen vetëm pak javë pasi Conceição përfundoi huazimin e tij me paraqitjet e fundit në Kupën e Botës për Klube në SHBA. Tani, 22-vjeçari do të qëndrojë në klub me kontratë të nënshkruar dhe të vulosur. Urime, Chico – mezi presim të të shohim sërish në fushë!”

Gjatë periudhës së tij si i huazuar, Conceição regjistroi 6 gola dhe 7 asistime në 40 paraqitje në të gjitha garat, pavarësisht se marrëveshja fillestare nuk përfshinte një opsion blerjeje – një vendim që Juventusi e mori gjithsesi për ta transferuar përfundimisht.

Vetëm Kenan Yildiz realizoi më shumë driblime për Juventusin gjatë sezonit 2024-25, ndërsa vetëm Dusan Vlahovic preku më shpesh topin brenda zonës kundërshtare.