Arbër Hoxha është lojtari më i ri i Dinamos së Zagrebit. Kampionët e Kroacisë do të paguajnë 1 mln euro në arkat e Slaven Belupos, ekip ku sulmuesi i majtë luante prej shkurtit të vitit 2022.

25-vjeçari i lindur në Gjermani, debutoi me Kosovën në janarin e vitit 2020. Tri ndeshje dhe një gol numëron me dardanët, ndërkohë që në Kroaci ka luajtur edhe me Lokomotivën e Zagrebit.

Skuadër ku u transferua në verën e vitit 2021 nga Ballkani. Përveç skuadrës nga Theranda, Hoxha është aktivizuar në Kosovë edhe me Prishtinën, Besën dhe Istogun.

5 gola dhe 3 asiste numëron Hoxha me Slaven Belupon gjatë këtij edicioni, shifra që shoqëruar me performancat pozitive ndikuan që të transferohej te “gjigantët” kroatë të Dinamos.

“Jam jashtëzakonisht i lumtur që kam arritur një marrëveshje me Dinamon dhe që jam bërë futbollist i këtij klubi të madh, më i madhi në Kroaci.

Falënderoj ish-shokët dhe ish-trajnerët e mi për të gjithë eksperiencat dhe për gjithçka që kam mësuar prej tyre. Tani po fillon për mua prova e vërtetë në kuptimin e plotë të fjalës.

Ka qenë një dëshira e kahershme të luaja me Dinamon. Sapo dëgjova për interesimin e tyre nuk pata dyshime për asnjë moment për ardhjen time këtu. Që u realizua për fat të mirë.

Do të jap më të mirën time, do të bëj çmos që të justifikoj besimin e klubit dhe të arrijmb së bashku suksese të shumta dhe të paharrueshme”, u shpreh Hoxha./SS