Peja sot është mposhtur nga Golden Eagle Ylli me rezultat 80-79 në kuadër të xhiros së katërt në elitën e basketbollit kosvoar.

Gjatë ndeshjes trajneri izraelit i Pejës, Rami Hadar, është përjashtuar nga loja për shkak të dy gabimeve teknike, shkruan Arbresh.info.

Pas ndeshjes në një intervistë për Art Motion, trajneri izraelit ishte i ashpër me deklarata rreth Federatës, gjyqtarëve dhe gjithashtu paralajmëroi një largim nga klubi pejan.

”Nuk dua të flas për rrjedhën e lojës, gjyqtarët vijnë me mision në ndeshje, nuk e di pse Federata nuk e ka dërguar asnjë gjyqtar me përvojë në këtë ndeshje, ndaj meje personalisht ka tendencë qe 3 vite. As vërejtje nuk më japin para teknikes, unë më nuk do të heshti, ju njerëzit në Kosovë duhet të zgjoheni nga gjumi dhe ta shihni realitetin. E marr përgjegjësinë e humbjes, nuk e di edhe sa do të qëndroj këtu, por ky është realiteti”, ka deklaruar Rami Hadar.

Kujtojmë se ai është trajneri i Pejës për të tretin sezon këtë vit dhe ka fituar titullin kampion në sezonin 2022/23.

Gjithashtu, Hadar është trajneri i kombëtares së Kosovës në basketboll./Arbresh.info