Emri i Liverpoolit është gdhendur në trofeun e Premierligës, më në fund.

Pasi e fitoi titullin e 19-të në ligën elitare angleze pas një pritjeje të gjatë plot 30-vjeçare, Liverpooli do ta çojë lart trofeun e Premierligës për herë të parë në histori të klubit të mërkurën mbrëma, pas ndeshjes kundër Chelseat në Anfield.

Pas ndeshjes kundër Chelseat, lojtarët dhe stafi i Liverpoolit do t’i marrin medaljet për vendin e parë si dhe trofeun e kampionit në një podium të ndërtuar në tribunën e famshme “Kop” në Anfield.

Ndeshja do të zhvillohet pa tifozë, siç ka ndodhur në çdo takim të Premierligës pas rifillimit të sezonit në qershor për shkak të rrezikut të përhapjes masive të koronavirusit.

Policia u ka bërë thirrje tifozëve të Liverpoolit të mos mblidhen pranë stadiumit të mërkurën.

/Gazeta Express/