Pasi siguruan mbijetesën në Superligën e Kosovës, skuadra nga kryeqyteti Bora menjëherë ka filluar të mendojë për sezonin e ri.

Bora pritet të nënshkruaj me trajnerin e njohur Lyobumir Minchev, shkruan Arbresh.info.

Sipas burimeve të portalit Arbresh.info, Bora dhe Minchev kanë gjetur gjuhën e përbashkët dhe bashkëpunim në sezonin e ri 2025/26.

Trajneri bullgar ditëve në vijim pritet ta nënshkruajë kontratën dhe gjithçka të bëhet zyrtare edhe nga ana e klubit kryeqytetas.

Bora debutoi këtë sezon në elitën e basketbollit kosovar dhe u rendit e shtata në tabelë.

Lyubomir Minchev është emër i njohur në basketbollin kosovar, pasi më parë ka qenë edhe trajner i Trepcës. Minchev i ka udhëhequr “xehetarët” nga sezoni 2021/22 deri në gjysmë të sezonit 22/23, ku ka fituar edhe Kupën e Kosovës, si dhe Superkupën Mbarëkombëtare.

Gjithashtu ka qenë edhe finalist në Superkupën e Kosovës dhe nënkampion me Trepcën në sezonin 2021/22 ku u mposht në finale nga Golden Eagle Ylli./Arbresh.info