Di Maria flet për situatën e Juventusit dhe vazhdimësisë së tij në ‘Allianz Stadium’

08:27 | 24 Janar 2023

Ylli i Juventusit, Angel Di Maria ka komentuar situatën që Juventusi është duke e kaluar për momentin.

‘Zonja e Vjetër’ ndodhet në një situatë jo të mirë.

Çështja e fitimeve kapitale që përfshiu Juventusin ka çuar në rihapjen e gjyqit sportiv.

Gjykata Federale në fakt ka pranuar kërkesën për revokimin e procesit të fitimeve kapitale, të paraqitur nga prokuroria e FIGC-së, duke e sanksionuar Juventusin me një dënim prej 15 pikësh në renditje.

Së fundmi në lidhje më këtë situatë ka komentuar edhe Di Maria.

Argjentinasi pranoi që janë në një moment të vështirë, por që nuk mendon të largohet nga ‘Allianz Stadium’.

“Kam ardhur në momentin më të keq për Juventusin, por jam i lumtur këtu, jam i lumtur. E rëndësishme është të jesh i fortë si klub dhe të përpiqesh gjithmonë të japësh maksimumin. Vendimi im varet gjithmonë nga familja ime dhe familja ime është e lumtur këtu. Është klubi më i madh në Itali dhe një nga më të mëdhenjtë në Evropë. Ne jemi mirë këtu”, u shpreh ai.

Kujtojmë që përveç problemeve financiare Juve mbrëmë nuk arriti të fitojë ndeshjen në kuadër të Serie A ndaj Atalanta (takimi u mbyll 3:3).

Shpërndaje në rrjete sociale